FİNLANDİYÄDÄ

Märhum Abdulla Ali äfände istälegenä

Abdullah Ali

Finlandiyädä yäşäüçe tatarlar zur yugaltu kiçerde. 85 yäşendä Finlandiyä Islam cämäate fahri räise Abdullah Ali vafat buldı.

Abdullah äfände 1925 nçe yılnıñ 9 dekaberendä dönyaga kilä. Yäş  vakıtınnan alıp ätise Abdul-Kayyum äfändegä säüdä eşendä yärdäm itä.

Mäktäpne tämamlagaç belem aluın säüdä mäktäbendä dävam itä. İkençe Bötendönya sugışında vatanın saklar öçen frontka kitep tugan ilenä olı hezmät kürsätä. Sugıştan kaytkaç çit ildä Londonda säüdä täcribäsen arttıru niyäte ilä İnglizgä säfär tota. Londonnan kaytkaç üzenä tire kibeten Erottaja uramına açıp cibärä. Tire alanında gına tügel, ul başka säüdä alannarında da eş alıp bara, misal öçen halı häm yort tezeleş säüdäsen dä uñışlı räveştä alıp bara. Yäş vakıttan mähallä eşläre belän kızıgıp mötävälli häyätenä disponent bulıp kerä. Ozın yıllar mähalläneñ hucalık eşlären başkara. Mötävälli häyätennän tış Sportklubı Yolduznıñ räise bulıp saylana häm fäaliyätenä küp öleş kertä. Anıñ citäkçelege arkasında Yolduz sport Algeriaga kadär barıp futbol uyınnarın uynıy.

1950 nçe yıllarnıñ ahırında mähallä tarafınnan tärtiplängän Islam yortın tezü häyäten citäkli. Tezü eşläre 1960 nçı yılnıñ dekaber ayında tämamlana. Şul tezeleş näticäsendä üsep çıkkan bina bügen dä Helsinki şähäreneñ urtasında tübäsendäge ayı, divarındagı Korän kalligrafı häm mäçet bülmäse belän möselmannarnı üzenä çakırıp tora. Bu bina şulay uk Finlandiyädä yäşäüçe tatarlarnıñ milli vä dini märkäze dä bulıp hezmät itä. Monda milli çäy kiçälär, konsertlar, spektakl pärdäläre häm başka milli haräkätlär ütkärelä.

1982-1988 nçe yıllarda Abdullah Ali mähalläne räis bularak citäkli. 1995 nçe yılda mähalläneñ fahri räis isemenä layeklı bula.

Abdullah Ali äfände dindar keşe ide. Ul namazlarga yörede, urazalar totıp, täravih namazlarına kilä ide. Hac häm ömrä gıybädätlären ütäde. Törle illärdä din çitäkçeläre belän elemtädä bulıp tordı. Rusiyäneñ törle imamnarı häm möftiläre Abdullah äfändene yakın kürde.

Şulay uk Abdullah Ali äfände FTB tarafınnan tärtiplängän kiçälärgä aktiv katnaşuçı ide.

Abdullah Ali äfändeneñ mäñgelekkä kitüe zur yugaltu buldı. Ul mähalläneñ baganalarınıñ berse ide. Tugrılıklı keşe bulıp başkalarga da tugrılıkka häm tırışçanlıkka misal kürsätte.

Allah Täalä Abdullah äfändeneñ ruhın şat, urının cännättä äyläsen ide. Kılgan böten sävaplı eşlären kabul itep, mäñgelektä Allahnıñ rizalıgına ireşergä nasıyp bulsın ide. 

İmam Ramil Bilal

Sportklubı Yolduznıñ yıllık cıyılışı

03.02.2011 Baş könne 31 nçe yanvarda sportkulbı Yolduznıñ yıllık cıyılışı ütte. Cıyılışta oyışmaga yaña räis häm başkarma saylandı. Kiläçäk ike eş yılı öçen räis bulıp Gölten Bedretdin saylandı. Yaña başkarmaga 6 keşe kerde. Cıyılışta kiräkle mäsälälär söyläşelde.

Sportklubı Yolduz törle sport haräkätläre tärtipli häm yäş azalarnı bergä tuplıy. Yaña başkarmaga eşlärendä uñışlar bulsın ide. 

FTB yıllık cıyılışı

30.01.2011 Finlandiya Türkleri Birligi (FTB) mädäni oyışmanıñ yıllık cıyılışı bügen buldı. Cıyılışta möhim mäsälälär turında kararlar çıgarıldı. Başkarma östennän mäsuliyät töşerelde. 2011-2012 yılları öçen yaña räis saylandı. FTB ne bu ike yılda Fazile Nasretdin hanım  citäkläyäçäk. FTB başkarma häyätenä tugız keşe saylandı. Saylaulardan başka da mädäni vä milli eşlär turında nık räveştä söylänelde. 

Yaña başkarmaga uñışlar bulsın. 

Märhumä
02.01.2011 Bügen kaygılı habär kilde. Millättäşebez Hayät Hamid märhum bulgan. Ruhı şat urını cännättä bulsın ide. Kümü vakıtı soñrak habär iteläçäk.


Mäyet
27.12.2010 Bügen millättäşebez Ergin Hakim vafat buldı. Märhumneñ ruhı şat urını cännättä bulsın. Kümü vakıtı bazar kön 2.1.2011 säat 14.00.


SINE belän küreşü

Finlandiyä İslam Şurası başkarması

14.12.2010. Baş könne mähalläbezneñ başkarması Finlandiyä İslam Şurası (SINE) başkarması belän küreşte. Utırışta SINE räise Abdi-Hakim Yasin Ararse oyışmanıñ fäaliyäte häm kiläçäkkä plannarı turında izahat birde. Mähalläbez tarafınnan räis Okan Daher añlatu yasadı. Küreşüdä bügenge köndä aktual bulgan mäsälälär turında fikerlär alışılıdı.

Belderü.

Suomen Islamilainen Neuvosto (SINE) ry Finlandiyä İslam Şurasi 2006 nçı yılnıñ 11 noyaberendä barlıkka kilgän. Şuranıñ maksatı Finlandiyädäge möselmannarnı tämsil itü, alarga yärdäm kürsätü Bügenge köndä şurada 20 aza oyışma hazer. Şuranıñ haräkäte belän www.sine.fi sahifäsendä tanışıp bula. 

Milli çäy kiçäse

"Show team" pärdäsendä                                  Räsem: Samil Nasretdin

14.12.2010.  Ütkän atnaraskönne Finlandiya Türkleri Birligineñ (FTB) milli çäy kiçäse buldı. Çäy kiçäneñ programı bay häm kızılkı ide. FTNneñ räise Deniz Bedretdin açılış süzendä bu çäy kiçäneñ hazerge başkarma tarafınnan tärtiplängän soñgı kiçä bulganın belgertte. Kiläçäk yanvar ayında yaña başkarma saylanaçak häm ul üz haräkäten takdim itäçäk. Program yäşlärdän tuplangan ”Show team” törkemeneñ küñelle pärdäse belän başlandı. Ul pärdäne Sabit Nasretdin yazgan. Kino yasauçı rejissör häm anıñ yärdämçese James Bond rolena keşelär saylıylar. Berese artık täcribäsez, ikençese sanak (computer) belän artık mataşkan, öçençesennän bala tavışı kilä.    Avır mäsälä. Läkin ahırda çın uynauçı problemnı kilep çişä. 

       Osta kürsätüçelär häm kızık stilda bulganga mini-spektakl halıknıñ igtibarın başınnan ahırha kadär cäleb itte. Porgam Fazile Nasretdin FTBneñ räisennän äñgämä yasau belän dävam itte. Deniz äfände ike yıl däverendä istä kalgan vakialar turında söyläde häm kiläçäk turında fikerläre belän urtaklaştı. 

        Şunnan soñ cinema uyını başlandı. Uyınnıñ tärtibe şulay ide: cinemadan alıngan räsem kara pärdä belän kaplangan.  Ul räsemneñ törle öleşläre açılgan vakıtta kem tizräk tanıp alsa şul ciñgän bula. İkençe uyın da bar ide. Ul cır uyını. Cır başlanıp beraz uynalgaç kiselep kuya häm uynauçıga cırnıñ süzlären dävam itärgä kiräk. Bu uyınnar bik kızık ütte. Çäy kiçäneñ ahırında lotteri uyını uynaldı. 
          Kiçä aş doası kılıp häm ”İ tugan tel” cırın cırlap tämamlandı.         

Mäyet
7.12.2010 Kiçä millättäşebez Urhan Saadetdin Kuopio şähärendä vafat itte. Märhum 55 yäşendä ide. Urhan Saadetdin Helsinki kaberstanında bazar könne 12.12.10 tarihında kümeläçäk. Kümü vakıtı säat 13.30. Ruhı şat urını cännättä bulsın. Amin. 


Mähallä yortı 50 yıl tutırdı.

Fahri räis Abdullah Ali çıgış yasıy.

5.12.2010. Bügen Helsinkidäge mähallä binabıznıñ tezelüenä 50 yıllık häm mähallä korıluına 85 yıllık  bäyräm tantanası ütte. Märasim bik küñelle häm canlı buldı. Mähallä räise Okan Daher mähallä binasınıñ möhimlege turında süz tottı. Şulay uk ul mähalläne koruçı azalarnıñ isemnären äytep çıktı. Räisneñ statistik habärläre kızıksınunı uyattı. Märhumnärneñ ruhına Korän ukıldı. Mähalläneñ fahri räise häm binanı saldıru häyäte räise Abdullah Ali tezü turında hatirälären söyläde. Ul faktlarnı añlatkan vakıtta, äyterseñ ul vakıtka bargan şikelle buldı. Halkıbız tarafınnan ike cır cırlandı. Tänäfes vakıtında halkıbız mähallä binasın karap üttelär, dürtençe katta räsem kürgäznäsen häm mähalläbezgä kilgän hädiyälärne karap çıktılar.

         İkençe bülektä imam Ramil Bilal mäçetlärneñ dinebezdä tarihı häm ähämiyäte turında söyläde. Azabız Naim Sadik matur tavışı belän öç moñlı cır başkardı. Halkıbız küz yäşlären yäşermäde.

Soñında fahri azalarga häm elekke mötävälli häyäte azalarına istälekle büläklär tapşırıldı.

Märasim "İ tugan tel" cırı belän tämamlandı.